Cylindrospermum badium J-8

Қабылдау және бөліп алу тарихы

• Шыққан елі: Қазақстан Республикасы
• Оқшаулау орны: Авангард ауылы, Жаңақорған ауданы, Қызылорда облысы
• Тіршілік ету ортасы: күріш алқаптары мен су экожүйелері
• Бөліп алғандар: Садвакасова А.К., Заядан Б.К., Қосалбаев Б.Д., Бауенова М.О. Әл-Фараби атындағы ҚазҰУ-дың биотехнология зертханасында
• Коллекцияға түскен жылы: 2022
• Соңғы анықтама: Садвакасова А.К., Заядан Б.К., Қосалбаев Б.Д., Бауенова М.О., 2023 ж.
• Бөліп алу тәсілі: табиғи үлгінің жинақтау әдісімен алынған дақылды микробиологиялық әдіспен біртіндеп себу арқылы бөліп алынды.
• Генетикалық ерекшеліктері: Табиғи түр
• Дақылдың жағдайы: аксенді

Морфологиясы мен құрылымы

Трихомалары түзу, бос орналасқан, қозғалмайтын немесе әлсіз қозғалатын, ұзындығы 15 мкм-ге дейін, 10 жасушаға дейін қамтиды. Вегетативті жасушалары цилиндр тәрізді, изодиаметрлі, кейде бөшке тәрізді, ашық көк-жасыл түсті, біркелкі, түйіршіксіз, өлшемі 1,8–6,8 × 2,3–4,3 мкм. Гетероцисталары терминальды, униполярлы, шар тәрізді немесе ұзарған, сары-жасыл түсті, өлшемі 3,0–5,9 × 2,3–3,2 мкм. Акинеталары көбіне цилиндр тәрізді немесе сопақша, ірі, ашық-қоңыр немесе сары түсті, түйіршікті, өлшемі 5,1–7,7 × 2,6–3,4 мкм, гетероцисталарға жанаса орналасады; кейде трихоманың бір ұшында екі акинета орналасады. Көбеюі жасушалардың бір жазықтықта бинарлы бөлінуі арқылы жүреді. Қатты ортада шырышты жасыл колониялар түзеді, кейін қоңырлау түске ауысады. Ескі дақылдарда өсірудің 10–15 тәулігінде гетероцисталар мен акинеталар байқалады.

Өсіру жағдайлары

• Қоректік орталар: Аллен, BG-11, Болд (сұйық және агарланған)
• Температура: 25–30 °C
• Жарықтандыру қарқындылығы: 30–40 мкмоль фотон/м²/с
• Жарық режимі: 16:8 сағ (жарық/қараңғылық)
• pH: 7,0

Физиологиялық ерекшеліктері

Мезофильді гетероцисталы цианобактерия; терминальды гетероцисталар мен акинеталар түзуге қабілетті. Азотфиксациялық потенциалы бар; ацетиленредуктазалық белсенділік тәжірибесінде көрсеткіші 1,36 ± 0,05 нмоль этилен мг⁻¹ құрғақ масса сағ⁻¹ болды.

Ұзақ мерзімді сақтау шарттары

агарланған BG-11 ортасында 12–14 °C температурада және әлсіз жарықтандыру жағдайында 4–6 мкмоль фотон/м²/с сақталады. Қайта егусіз сақтаудың ең ұзақ мерзімі — 2–3 ай.

Генетикалық ақпарат

16S rRNA генінің фрагменті амплификацияланған. Морфологиялық және филогенетикалық талдау нәтижелері бойынша штамм Cylindrospermum badium J-8 ретінде идентификацияланған. GenBank нөмірі: MZ079357.

Қолданылу аясы

Штамм эксперименттік зерттеулерде қолданылады. Биотыңайтқыштар жасау, биоремедиация және альгоцианобактериялық биоқабықшалар қалыптастыру үшін перспективалы.

Библиография

1. Sadvakasova A.K. et al. Influence of Mo and Fe on Photosynthetic and Nitrogenase Activities of Nitrogen-Fixing Cyanobacteria under Nitrogen Starvation. Cells. 2022; 11(5):904. DOI: 10.3390/cells11050904.

Патенттер және басқа зияткерлік меншік

жоқ